جريدة شعراء الغربة

الشاعرعبدالله السايح

.....(شهر الخير)........

قالولي إكتب
واقول عنك
وانا اللي مستني
تكون عندي
واكون عندك
من سنه وانا
مستني تكون هنا
يا شهر كريم
ومن كرمك
معاك الحب والهنا
كتير منك
يا جايب فرحة مقسومه
وناصب زينة من صومه
وفيك شياطين ومهزومه
وطول الشهرمفيش قومه
قضية وفيها محسومه
وسايبنا نقوم قومه
في ليل السجده معلومه
وطول الشهر منظومه
كتير الناس فى عزومه
بتقرا كتاب فى معلومه
بعيد عن دنيا ملخومه
في قول الحق ورسوله
آيات نقرأها بالسوره
وتترتل آيات الله
ونسمع شرحها بطوله
وبيت الله بنشوفه
صفوف واقفه ومصفوفه
في كل آذان وبنقوله
وناس للفرض يمشوله
وكل فقير ومنشوره
يروح له الخير ومحصوله
وتتقابل أيادي الناس
كفوف بالخير ويعطوله
ياشهر كريم ومتقسم
وفيه الخير بيتنسم
بتيجي في أولك رحمه
وبيها الناس بتتحسن
يتيمك فيه بيتكرم
وكل الناس بتزوره
عشان الله ورسوله
في وشه الناس بتتبسم
في وسطك ربنا يغفر
إلهي وقلنا غفرانك
وشوش بتدور وبتدور
كبير بنلاقي وصغير
على مصدر لكربانك
يا شهر المنحه والتوبه
في كل الناس أشوف نوبه
تصيب القلب وعيوبه
وتبعدهم عن الخيبه
في شهر كبير وفيه الخير
ينادي الغير
يقول خدني
على آخري
تلاقي العتق من النار
ويوم ورا يوم
تلاقي النار بتنهار
وتتزين لك الجنه
وتدخلها بدون خيار
ف سوق منصوب ويا بخته
تاجر تجارته مع ربه
وبإيديه إشترى دربه
ويعطي الكل ويحبه
وليلة القدر يستنى
في آخر عشرة يتمنى
يشوفها هيدخل الجنه
عريس بالخير هيتحنى
وفى الجنة مع الصادقين
قالولي اكتب
وانا هكتب لإمتى وفين
يا شهر الخير ومتكبل فيك الشياطين

........(شعر)..............
عبدالله السايح