اكتب كلامك يا قلم
قول أد ايه فينا الألم
احكى ع اللى نسى عهدنا
وضح حروف كلمة ظلم
صرح وقول كل الكلام
متخافشى من حد الملام
خلاص على الدنيا السلام
عدى ومشى أوان الندم
قول أد إيه كان حبنا
ساكن صدورنا وقلبنا
ومكانش فى اتنين زينا
وأد إيه كان العشم
اشهد عليه وقول انو خان
نسى اللى بينا واللى كان
يا خسارة الشوق والحنان
كان عش هادى وانهدم
قول إنى عرفتو الطريق
قول انو كان خل وصديق
مديتلو يدى وكان غريق
وفلحظه صار كلو عدم
اكتب وخليه يقرا الكلام
قوله اللى صار منك حرام
نسيت كلامك والغرام
وعيش وملح وعشره ودم
حبر دا وللا دموع
خارجه من بين الضلوع
نازله بتطفى الشموع
بتحكى عن قلب اتهزم
منير خاطر
ليست هناك تعليقات:
إرسال تعليق