جريدة شعراء الغربة

Talia Amr

مش كل من قال باعشقك عاشقك بجد
و لا كل من مرة سمع منك ندا بادر و رد
و لا كل ايد تتمد لك عايزاكى فوق .
و لا كل من باس العلم و دموعه عوم فى الازمة سد
اصل انت عشقك مش كلام و لا نحنحة و لا بس قول
حبك قلوب تعرف تكون و قت السفر نقطة وصول
حبك يقين انك وطن .... حبك شجر يطرح عقول
حبة عيال لحظة ما ضحكك كان وجع فيهم مشاعر طاوعتك
حبك عيال على كفهم الروح ما تسواش دمعتك
سال دمهم لحظة ما ضحكك كان وجع
ما سألوكيش فين التمن و لا غنوا ساعة و قعتك
و لا لحقوا من هددك قوالب يبنوا بيها مجدهم
و لا سابو حلمك ينتحر و لا زادوا يوم عن حدهم
كل اللى فيهم انتى فين ..... و انتى النهاية عندهم
و لا خافوا من برد السجون ... و لا هزهم صوت الرصاص
كل اللى كان بيهمهم ... لو تلبسى توب الخلاص
و تحسى مرة بجرحهم .... او تمسكى سيف القصاص
مش كل من قال باعشقك يا خضرا فجأة تصدقيه
فيهم اللى خانك و اللى باعك .... و اللى غمض يوم عنيه
و اللى ارتضى يبوس الجزم ... جزم اللى داس فيكى و فيه
و اللى اختفى ساعة المخاض و اتدارى من وش الكلاب
و فى لحظة جاى عامل جدع ..... و نسى انه و قت الشدة ساب
و لسانه تعبان ... لدغته ... دايما فى اعراض الشباب
ما تصدقيش يا طيبة حلو الكلام و معسلة
دا اللى انتى فاكراه مغرمك .... حافظ لدور بيمثلة
دم الشهيد على سحنته ... مالحقش حتى يغسله
‫#‏فهمى‬ _على