التعب بيا للكاتب طارق السيد

التعب بيا
موجوع ياقلبي والتعب بيا
مخدوع ياقلبي وإتلعب بيا
وإللي خدعني كتير لوعني
وأنا إللي شايله في نن عنيا
كان كل حياتي ومافي دنياتي
كان يثبت ذاته ويدهس ذاتي
وبرغم الذل ياقلبي ومره
كنت أستعذب حتى آهاتي
ولعت صوابعي العشرة شموع
كان يعطش كنت أنا الينبوع
ياما ناديته وإترجيته
صوتي ماكان له قي يوم مسموع
كنت بخاف م النسمة عليه
ويكحل عيني تراب رجليه
كان هو الروح إللي بتسكني
وضي عنيا إللي بشوف بيه
كان لما يطل النسمة تهل
والياسمين يحضن في الفل
ماأنت ياقلبي عارف كان إيه
كان دايما عندي أنا فوق الكل
كان كل ياقلبي إللي أتمناه
يرضى عليا أنعم برضاه
معلش ياقلبي أنا دايب فيه
مقدرش أعيش مع حد سواه
وكنت ياقلبي أنا بالنسباله
لعبة في إيده بيلعب بيها
حتى اللعبة دي ولا على باله
بعد مايلعب بيها يرميها
إدعي معايا ياقلبي أنساه
أنساه بجحود قلبه وآساه
وإذا كان ع الصبر
ياقلبي أنا هصبر
لحد ماأطيب من جرح هواه
بقلم طارق السيد