جريدة شعراء الغربة

الشاعر احمد الخليلى

على إيه
فليخرج الحُرَّاس ماعدش
فى ف الرّاس غير
حَبّة خُرافه مع هلوسه ووسواس
فليخرج الأنجاس
فوق قمّة المشهد
الميضه راحت عليها
تجديد ف صورة هَدّ
مبقاش داخلنا بجد لا خشوع
ولا شعره توحّد حد
ما أقبح الإنسان بلا ماركه
ولا عنوان
ما أقبح الرُتبه بلا إنسان
يا واكل وشارب ورغم دا
هارب
بتحصى بالمليم إحصى كده نفسك
عِدّ كام نَفَسَك فليخرج الحُراس
مبقاش خلاص ف الراس
غير خطه مسمومة لفكرة محمومة
ف ضمير منداس
على ايه حتترّصو مالحال قريت
نَصُه
مضروب اهو ف نُصه من ساعة العُميان
ما أقسموا بَصّوا
والشوَّافين خايفين ومهيّفين
ومهوّفين والحِسْ بقى نار
للى بيحسّوا
صُب لى واتوّصى خلّينا
ننسو