كان نفسي للكاتب منير خاطر

كان نفسى
مسيبش الدنيا وانا زعلان
ومكنتش اشوف ظلم الإنسان
انا شفت فى آخر ايامى
حاجات مكانتشى فى الحسبان
كوابيس بتجينى فى منامى
وعمايل بتشيب منها الولدان
انا شفت الأخ بيقتل اخوه
وضماير راحت فى خبر كان
انا شفت الواطى بيعلوه
والعالى بيعانى الخزلان
شفت اللى بيسرق وبيدوه
واللى شريف عايش تعبان
شفت سمانا اللى كانت صافيه
غايمه بتنعق فيها الغربان
شفت شبابنا يعطيه العافيه
عايش عاله على أبوه الغلبان
شفت الجاهل صوته عالى
والعالم يهمس فى اللودان
شفت الكل يقول وانا مالى
سيبنى ف حالى أنا شقيان
خلينى اربى في عيالى
وقول عنى إنى جبان
منير خاطر

أعجبنيتعليق

التعليقات